Gschichdla on Versla



Dr Ahna ihr Henna hot oa graoßes, gotziges Oa glegt on se hot sich riesich grfeid, daß se mit dem graoßa, gotziga Oa ihrem Bua a Oakiachle brota ka. On wia des Oakiachle en dr Pfann brotat, muß se mol gschwend naus. En dera Zeit kommt des Hannesa-Karle doher on hot des Oakiachle vo daem graoßa, gotziga Oa gfressa.

Dr Ludwig war a bsondrar jonger Kerle. Wenn'r zom Nuijohrwaischa ons Gscheek ahola zu seim Dete het sodda, hot er oms Verrecka net wella. Dia andre Patakender sen schao do gstanna, wenn'se ehn halba mit Gwalt zom Dete brocht hen. Vor Wut hot er no gschrie: "Schuirabära, Schuirabära, Dachmaader, Hohlziegel!"

Als dr Vetter Karle zom erschte mol bei seine zokinftige Schwiegerleit gwä isch, hot en sei Vatter schpäter gfrogt, wiea`s denn gwä wär. "O" sait dr Karle "i be schau ganz oiga mit meim Schwär. Wia mr an da Disch naghoggt sen , hoder gsait: Friss, du Daggl!"

Oser Taodagräber Fritz hot Humor ghet. Em "Adler" hot omol a Auschdluzer zu em gsait: "Mi kosch du amol net vergraba, i lass me verbrenna."- "Ha," sait dr Fritz, "no brengsch halt dei Äsche ri!"
Wie ner mol a Kuh uff kaufet hot welle on koa Geld ghet hot, hot en seller Viechhändler gfrogt, ob er Sicherheita häb: "Hajo, des isch koi Broblem, i hao fir daused Mark alde Leit em Flecke."
Oin Fehler hoter abr ghet, emmer hot er Gräber z`kloi g`macht. Als a bsonders Dicker gstorba isch, moint dr Fritz: "Herrgott, jetzt brenget die wieder a Saukischt!" Schnell hot er d`Grub no a bissle graißer gmacht, aber dr Sarg isch schtecka blieba. Was macht oser Fritz? Er sprengt mit oim Satz uff der Sarg on hoppt on hoppt bis`r nagoht.

Fritzle guggt mit seira Oma dr Fesschtzug a. Nebadra uff dr Miste sieht `r an Gocggeler, wo grad uff a Henn steigt. "Oma, worom sitzt der uff die Henn nuff?" "Damit `r da Feschtzug besser säh kao!"

Dr Gottlob isch em Adler g`hoggt on hot g`veschbert, wia jedn Dag, Schwartamaga mit viel Senf. Am Nebadisch isch a Mo mit seim Weib g`hoggt. Der Mo guggt dem Gottlob a Weile zua on fragt no: "Guter Mann, was essen sie denn da?" "Schwaartamaga on Senf."  "Ja, schmeckt denn das"? "Des isch besser als an Arsch voll Schpreißa!" "Ja, wir sind aus Preußen " said do des Weib, wo koi Word verschtanna hot.

Dr Salomo war a gscheiter Kopf on hot oft da Lehrer on dr Pfarrer mit seine Sprich onderhalda. Dr Pfarrer frogt a mol: "Salomo, wo haben Sie Ihre Weisheit her? Sie lesen wohl viel?" "O ja," sait do  dr Salomo. "Aber was leset Ihr denn?" "Erbsa on Leisa, Herr Pfarrer!"

Dr Jakob on sei Weib waret uff`m Feld on henn uff oimal Glocka bimmla g`hairt. A Mo uff ama andre Acker schreit:" S`brennt, s`brennt!!" Am Jakob sei Weib joomert: "Hotz, des wurd doch net bei osram Heisle sei?" "Schwätz koin Babb, bei os koas net brenne, i hao jo da Schlissel em Sagg!"

Em "Adler" dren, am ronda Disch - do sitzt a Haufa Manna. Sia schwäzet iber des on sell - on sosch no ällerhand. Bloß,  wenn se na äls drenga deant - no isch a Weile Ruah - soscht aber gohts em Adler dren - wia uff em Johrmärkt zua.
Mer schwäzt vom Weddr - iber d`Leit - on vo dr Bolidigg - on z`letscht kommad d`Gmeinräd dra - a  jeder Schtigg fir Schtigg.. Bis oiner zu de Baura sait - se kennad  z`frieda sai - mit dem was des Johr gwasa sei - d`Grombiera seiat riesagroß - fascht gar wia Kenderkepf - on wenn ehne des net langa dä - no seiads arme Trepf. Do schreit dr Schorsch - mer kennt en jo - :"Dees isch dui Lomberei - graoße, des geits haufaweis - bloß kloine net fir d`Sei!"

Letze Änderung Donnerstag, 20 Dezember 2018 21:11
« Oktober  2020 »
MoDiMiDoFrSaSo
 1234
567891011
12131415161718
19202122232425
262728293031